تسجيل مستخدم جديد

المشاريع

ذيع إنت!

"ذيع إنت": قناة يوتيوب هدفها ببساطة؛ إن الناس في الشارع يكون عندهم فرصة حقيقية يعبروا فيها عن نفسهم بحرّية.
البرنامج فكرته إن أي شخص عايز يعبر عن رأيه بيكون هوّ المذيع والضيف وكمان المصور!
عن طريق كشك جواه ستوديو صغير بيلف كل محافظات مصر، من خلاله يقدر الناس إنهم يصوّروا نفسهم ويقولوا كل اللي نفسهم فيه براحتهم.
"شريف" عنده رؤية لبرنامجه إنه يبدأ أونلاين ويعمل شعبية كبيرة، وفي خلال سنة يكون برنامج مشهور على قناة تلفزيونية كبيرة.

ذيع انت برومو .أنت المصور المذيع وكمان الضيف from PMC Egypt on Vimeo.

 شريف بيقول عن مشروعه:
 "ده المشروع الي خلاني أكون من المتسابقين النهائيين في برنامج المشروع، برنامج يغير الإعلام الروتيني شوية، يكون فيه الناس العادية هما النجوم، والنخب والناس المشهورة يريحوا شويه و يسمعو الـ ٨٥ مليون، من جوه كشك شكله غريب بيلف كل حتة في مصر وبيروح حتت مدخلهاش كاميرا قبل كده، أو حتي كهربا من أساسه، من جوه الكشك ده هتبقي انت المصور، المذيع و كمان الضيف، ذيع إنت"

ذيع إنت على اليوتيوب:
http://www.youtube.com/user/pmcegypt?feature=watch 
صفحة المشروع على فيسبوك:
https://www.facebook.com/zee3enta

إنتاج وتعبئة زيت الزيتون في "بئر العبد"

مشروع "فرج" هيكون أول مشروع لإنتاج وتعبئة الزيتون في منطقة "بير العبد" في شمال سيناء. المشروع بيعتمد في الأساس على محصول الزيتون الكبير في "بير العبد" والمنتجات هيتم تصديرها للمحافظات، وبعدها للخارج.
كمان المشروع هيساهم في توظيف عدد كبير من شباب البدو في العريش اللي بيعانوا من البطالة وقلة التوظيف الحكومي.

 

Beyond More

مشروع هدفه تغيير مفهوم المجتمع عن التعليم، وتغيير طرق تقييم الطلبة وزيادة مشاركة المجتمع في تطوير التعليم، المشروع في الأساس هيكون عن طريق بناء نظام تعليمي على الإنترنت، مصطفى عنده طموح كبير إن مشروعه يمتد لمحافظات مصر كلها بعد ما يقدر يثبت نجاحه في إسكندرية.
لمعلومات أكتر عن المشروع: https://www.facebook.com/Beyond.More.Corp

إنكا

 مصطفى بيحاول من خلال مشروعه يعمل تغيير في بيزنس النسيج في مصر، عن طريق الشغل على تصميمات وألوان جديدة وكمان منتجات جديدة. وعشان كده عمل مشروعه "إنكا" اللي بيحاول يوصل فيه لقطاعات كبيرة بمنتجات وتصميمات مختلفة عن المنتشر في السوق، "مصطفى" بيحلم إنه مشروعه يكبر ويتحول لعلامة تجارية مصرية وعالمية مميزة.
صفحة المشروع: https://www.facebook.com/Incaeg
إنكا على "تويتر": https://twitter.com/Incaeg

 

منتجات نوبية يدوية

مشروع "ثريّ" بيضرب عصفورين بحجر واحد؛ مصنع للمنتجات النوبية اليدوية اللي محتاجة للتسويق والتعريف أكتر بيها في السوق، وفي نفس الوقت بيساهم في حل مشكلة عدد كبير من ذوي الاحتياجات الخاصة اللي بيعانوا من قلة التوظيف ورفض سوق العمل بسبب ظروفهم.
"ثريّ" استلهم المشروع من تجربة صديق ليه من ذوي الاحتياجات الخاصة، ومؤمن بإن الشغل هو أفضل وسيلة لدعم وبناء أي إنسان، وواثق إن مشروعه خلال من 6 لـ 8 شهور هيكون قام على رجليه.

 

مصنع تيشيرتات

ميدو عايز ينتقل من مرحلة "بيع" التيشيرتات وملابس الشباب، لمرحلة إنه يصنّع، يوزّع ويبيع، كل اللي محتاجه ميدو هو مكان معقول ومكن وشباب يشتغل، وبعلاقاته وخبرته في مجال بيع الملابس هيقدّر ينجح في وقت بسيط.
ميدو مبيحبش الشراكة، وقدامه تحدي كبير يثبت فيه إنه فعلا يقدر ينجّح مشروعه وسط منافسة سوق الملابس القوية.

 

ورشة إبداع

مكان واحد هتلاقي فيه: أكل ومشروبات، ورش عمل (تصوير، رسم، مونتاج، رقص، تمثيل) ودروس يوجا..إلخ، يقدر من خلاله يساعد الموهوبين واللي عايزين يكتشفوا مواهبهم، كمان "سيمو" هيخلي أطفال الشوارع يقدروا يزوروا المكان ويحضروا أي ورش عمل يحبوها مجاناً!

أيسك (الشركة المصرية المستدامة)

مشروع أمنية، واللي اختارت له اسم  أيسك (الشركة المصرية المستدامة) بيحل مشكلة البطالة بطرق جديدة ومبتكرة، بيحافظ على البيئة وبيدير موارد البلد البشرية والطبيعية بشكل مباشر وسريع. 

Swan house

"ريهام" بعد التخرج من دراسة الأزياء والماكياج، اشتغلت في صالون "محمد الصغير" أشهر وأكبر صالون للجمال في مصر، لكنها قررت إن تبدأ مشروعها الخاص، وفعلا أسست "Swan house" للأزياء والتجميل، اللي بتحلم إنه يكون له فرع في كل محافظات مصر، ويتحول لماركة مشهورة في عواصم العالم.
"ريهام" قدامها منافسة صعبة جدا في عالم الأزياء والماكياج، ومنافسين كتير حققوا اسم كبير في نفس المجال، لازم تثبت إنها جديرة بثقة العملا في وجودهم.
مشروع ريهام Swan house:
https://www.facebook.com/SwanHouseBeauty

 

 

هاند ديكوريشن

"هاند ديكوريشن" شركة لبيع وتسويق اكسسوارت من الحرف اليدوية المصرية. بتحلم "أسماء" إنه يبقى أكبر اسم في مجال صناعة المنتجات اليدوية المصرية (منتجات الفخار والخشب والجلد والنحاس)، وإنها تقدر تحافظ على تراث مصري وعربي أصيل من خلال الصناعة دي، عن طريق إنها تشبّك الحرفيين و وفنانين المنتجات اليدوية بمنافذ البيع والتسويق، وإنها تخلق تصميمات ومنتجات جديدة في السوق.
لمعلومات أكتر عن مشروع "أسماء": https://www.facebook.com/pages/Hand-Decration/182174458642806

 

 

 

فوفو

"فوفو" لتصميم وإنتاج كل منتجات القماش زي التيشرتات أو الشنط..إلخ، باستخدام الفلكلور العربي و الشخصيات المصرية، ده مشروع "فدوى"، واللي بتحلم إنه خلال 3_5 سنين يتحوّل لماركة عالمية، "فدوى" كانت من أول الناس اللي ابتكروا ونفذوا تصميم بكتابات عربية على التي شيرتات.
قدامها منافسة قوية جدا في سوق صناعة الملابس الحديثة، بتخطط كمان تصمم وتنفّذ منتجات يدوية تانية زي الإكسسوارات ووحدات الإضاءة ومنتجات منزلية مختلفة.زي الستاير والأباجورات.
لمعرفة أكتر عن مشروع "فدوى":
http://www.fofodesigns.com/
https://www.facebook.com/fofotshirts

 

توليد طاقة بديلة نظيفة

مشروع "تينا" هو توليد الطاقة من المخلفات العضوية، لاستخدامه في مجالات متنوعة، زي التدفئة وإنتاج الكهرباء، المشروع هدفه تحقيق الاكتفاء الذاتي من الطاقة، بالإضافة إلى إنتاج وقود أكثر محافظة على البيئة. 
"تينا" استلهمت فكرة المشروع من نموذج ناجح في البرازيل، قدر يولد الكهرباء من مادة "الإيثانول".
قدام "تينا" تحدّي كبير بسبب إن مشروعها محتاجة ميزانية ضخمة، بالإضافة لأبحاث وتجارب دقيقة وأكيدة النتايج.

 

مسرح باطرو المتحرك للعرايس

"مسرح عرايس باطرو المتحرك" كيان متنقّل يلفّ محافظات مصر كلها، ويقدم عروض مختلفة في كل حاجة، مش بس مسلية وإنما كمان بتقدم للجمهور أفكار جديدة عن حقوق الإنسان وقضايا اجتماعية كتير.
سارة فاهمة كويّس إن العبرة في المشاريع مش بسّ بالفكرة، وإنما بكيفية التنفيذ، عشان كده هي بتخطط دايما تفضل تنافس في السوق عن طريق تقدم تصميمات جديدة للعرايس ومحتوى مختلف للعروض وتقديم خدمات مختلفة جديدة.
اعرف أكتر عن مشروع سارة:

https://www.facebook.com/BatroPuppets

 

 

 

مدرسة رقص

"شيرلي" بتحلم إنها تعمل تغيير في المجتمع وتغيّر فكرة الناس عن فن الرقص والراقصين في مصر. مشروعها هو مدرسة لتعليم جميع أنواع الرقص المختلفة، للراغبين من كل الأعمار والفئات والطبقات، ومجاناً للموهوبين من الأطفال والشباب اللي مايقدروش يدفعوا تكاليف الدراسة.

إستطلاع رأي

هل تريد المشاركه في استلاع الرأي الخاص ببرنامج المشروع ؟

إستطلاع رأي

هل تؤيد قرار مراقبة مواقع التواصل الاجتماعي؟ هل توافق على أن تجري الحكومة تعديلات على قانون تنظيم حق التظاهر؟

ما رايك فى الموقع الجديد ؟